بسم اللــــه الرحمـــــــــن الرحيم
அஷ்-ஷெய்க் அபூ அப்திர் ரஹ்மான் நவ்வாஸ் அல் ஹிந்தி ஹஃபிதஹுல்லாஹ்
இமாம் இப்னு பாஸ் மற்றும் அல்லாமா அப்துர் ரஸ்ஸாக் அஃபீஃபி ரஹிமஹுமுல்லாஹ் ஆகியோர் அங்கம் வகித்த நிரந்தர ஃபத்வா குழுவிடம் (அல்-லஜ்னதுத் தாஇமா) கேட்கப்பட்டது…
கேள்வி 2: முஸ்லிம்கள் வேதக்காரர்கள் (யூதர்கள் மற்றும் கிறிஸ்தவர்கள்) அல்லது இணை வைப்பவர்கள் (முஷ்ரிக்கீன்கள்) தங்களுடைய பண்டிகைக் காலங்களில் தயாரிக்கும் உணவுகளை உண்ணலாமா அல்லது அவர்களின் பண்டிகைக்காக அவர்கள் தரும் அன்பளிப்புகளை ஏற்றுக்கொள்ளலாமா?
பதில் 2: முஸ்லிம்கள் யூதர்கள், கிறிஸ்தவர்கள் அல்லது இணை வைப்பவர்கள் அவர்களுடைய பண்டிகைகளுக்காகத் தயாரிக்கும் உணவுகளை உண்பது அனுமதிக்கப்பட்டதில்லை, மேலும் முஸ்லிம்கள் அவர்களுடைய பண்டிகைகளுக்காக அவர்கள் தரும் அன்பளிப்புகளை ஏற்றுக்கொள்வதும் அனுமதிக்கப்பட்டதில்லை.
ஏனெனில், இதில் அவர்களுக்கு மரியாதை அளிப்பது, அவர்களுடைய சடங்குகளை வெளிப்படுத்துவதில் அவர்களுடன் ஒத்துழைப்பது, அவர்களுடைய புதுமைகளைப் (பித்அத்) பரப்புவது மற்றும் அவர்களுடைய பண்டிகை நாட்களில் அவர்களுடன் மகிழ்ச்சியில் பங்கு கொள்வது போன்ற அம்சங்கள் உள்ளன. இது, அவர்களுடைய பண்டிகைகளை நாம் நமது பண்டிகைகளாக எடுத்துக் கொள்வதற்கோ, அல்லது நம்முடைய மற்றும் அவர்களுடைய பண்டிகைகளில் உணவு பரிமாறிக் கொள்வதற்கோ அல்லது அன்பளிப்புகள் கொடுப்பதற்கோ இட்டுச் செல்லலாம். இது சோதனைகளில் (ஃபித்னா) ஒன்றாகும், மேலும் மார்க்கத்தில் ஒரு புதுமையாகும் (பித்அத்).
நபி ஸல்லல்லாஹு அலைஹி வஸல்லம் அவர்கள், “எவர் நமது மார்க்கத்தில் அதிலில்லாத ஒரு விஷயத்தைப் புதிதாக உருவாக்குகிறாரோ, அது நிராகரிக்கப்பட்டதாகும்” என்று கூறியுள்ளது உறுதிப்படுத்தப்பட்டுள்ளது.
அதேபோல், அவர்களுடைய பண்டிகைக்காக அவர்களுக்கு எதையும் அன்பளிப்பாகக் கொடுப்பதும் அனுமதிக்கப்பட்டதில்லை.
வல்ல அல்லாஹ்விடமே உதவி தேடப்படுகிறது. மேலும், அல்லாஹ் நம்முடைய நபி முஹம்மது மீதும், அவருடைய குடும்பத்தார் மற்றும் தோழர்கள் மீதும் அருளைப் பொழிவானாக.
📚 ஃபதாவா அல்-லஜ்னதுத் தாஇமா – 1 (22/399) ஃபத்வா எண் (2882) இன் இரண்டாவது கேள்வி.
இமாம் இப்னு உஸைமீன் ரஹிமஹுல்லாஹ் அவர்கள் கூறினார்கள்…
… இறைமறுப்பாளரின் அழைப்பை ஏற்பது அனுமதிக்கப்பட்டதாகும், சமயச் சடங்குகளைக் குறிக்கோளாகக் கொண்ட விஷயங்கள் தவிர. சமயச் சடங்குகளைப் பொருத்தவரை, அதற்கு பதிலளிப்பது ஹராம் ஆகும், அவர்களுடைய பண்டிகைகளைப் போல; ஏனெனில் அதற்கு பதிலளிப்பது அதை ஏற்றுக் கொள்வதைக் குறிக்கிறது, மேலும் அது மத நம்பிக்கையின் அடிப்படையில் செய்யப்படுகிறது, எனவே ஒருவர் அவர்களுடைய மார்க்கத்தை ஏற்றுக்கொண்டு அதை அங்கீகரிப்பதைப் போலாகிறது. இதனால்தான் – அறிஞர்களின் ஒருமித்த கருத்தின்படி – அவர்களுக்கு வாழ்த்து தெரிவிப்பது அனுமதிக்கப்பட்டதில்லை, ஏனெனில் நிராகரிப்பின் (குஃப்ருடைய) சடங்குகளை அங்கீகரிப்பது மிகவும் தீவிரமான ஒரு விஷயம், அல்லாஹ்விடம் பாதுகாப்புத் தேடுகிறோம்.
📚 அஷ்-ஷர்ஹுல் மும்திஃ அலா ஜாதுல் முஸ்தக்னிஃ (12/322)
மேலும், இந்த பண்டிகையைக் காரணமாக வைத்து ஒரு முஸ்லிம் மற்றொரு முஸ்லிமுக்கு அன்பளிப்பு கொடுப்பதும் அனுமதிக்கப்பட்டதில்லை.
ஷெய்குல் இஸ்லாம் ரஹிமஹுல்லாஹ் அவர்கள் கூறினார்கள்:
“யாரேனும் இந்த பண்டிகைகளில், மற்ற எல்லா நேரங்களிலும் இல்லாத, வழக்கத்திற்கு மாறான ஒரு அன்பளிப்பை முஸ்லிம்களுக்கு அளித்தால்: அந்த அன்பளிப்பு ஏற்றுக் கொள்ளப்படாது, குறிப்பாக அந்த அன்பளிப்பு அவர்களைப் பின்பற்றுவதற்குத் துணையாக இருந்தால், பிறந்தநாள் விழாவில் மெழுகுவர்த்தி போன்றவற்றை அன்பளிப்பு செய்வது போல, அல்லது அவர்களுடைய நோன்பின் முடிவில் வரும் சின்ன வியாழக்கிழமையில் முட்டை, பால் மற்றும் ஆடு போன்றவற்றை அன்பளிப்பு செய்வது போல.
அதேபோல், இந்த பண்டிகைகளில் பண்டிகையைக் காரணமாக வைத்து எந்த முஸ்லிமுக்கும் அன்பளிப்பு கொடுக்கக் கூடாது, குறிப்பாக அது அவர்களைப் பின்பற்றுவதற்குத் துணையாக இருந்தால், நாம் மேலே குறிப்பிட்டது போல.”
📚 “இக்திழாவுஸ் ஸிராத்தில் முஸ்தகீம்” எனும் நூலிலிருந்து.
📚 ஜாமிஉல்-மஸாயில் – இப்னு தைமிய்யா, அத்தாயாத் அல்-இல்ம் பதிப்பு (3/373–377)
அஷ்-ஷெய்க் நவ்வாஸ் அல்-ஹிந்தி அஸ்-ஸெய்லானி ஹபிளஹுல்லாஹ் அவர்களின் உத்தியோகபூர்வ ஆங்கில டெலிகிராம் சேனலில் (Telegram Channel) இருந்து தமிழாக்கம் செய்யப்பட்டது: https://t.me/NawwasalHindiEng/633
